СЕН — ҚУДРАТ МАНБАИ, САОДАТ МАСКАНИ, ЖОНАЖОН ЎЗБЕКИСТОНИМ!
Юртимизга мустақиллик неъмати ато этилиб, истиқлол шабадаси эсганига ҳам мана йигирма тўққиз йил тўляпди. Бу давр мобайнида биз асрларга татигулик тараққиёт ва муваффақиятларга эришдик. Яъни мустақиллик бизга кўҳна тарихимизни, бой меросимиз, миллий давлатчилигимизни, муқаддас динимиз, урф-одат ва анъаналаримизни қайтариб берди. Энг муҳими жаннатмакон Ўзбекистонимизни бутун дунё тан олди.
Мамлакатимиз мустақилликка эришгач айниқса, юртдошларимиз қалбида меҳр-оқибат, бағрикенглик, ҳамжиҳатлик каби олижаноб фазилатлар, миллий ва умумбашарий қадриятларга ҳурмат, Ватан тақдири ва келажагига дахлдорлик туйғуси юрагининг туб-тубидан ўрин олди.
Бу айниқса, бугунги синовли кунларда мамлакатимизда юз бераётган мураккаб синовларни муносиб енгиб ўтишда ўз аксини кўрсатмоқда. Одамларимиз бир ёқадан бош чиқариб, ўз олдига инсонийлик, бағрикенглик, саховат ва олижаноблик каби эзгу мақсадларни қўйган ҳолда мустақиллик байрамининг 29 йиллигини кутиб олишга тайёр турибди.
“Сен — қудрат манбаи, саодат маскани, жонажон Ўзбекистоним!” шиори остида бу йил истиқлол байрамини кутиб олар эканмиз зеро, Юртбошимиз айтганларидек, “Халқимизнинг энг катта бойлиги бу – тинчлик ва омонликдир“. Демак, юртимиз тинч, халқимиз фаровон, фарзандлари соғлом ва кексаларимиз дуогўй экан, бугунги пандемия даври албатта, тез кунларда ортда қолиб, ҳар кунимиз қувончли кунларга уланади. Чунки, бундай элга доимо байрам ва тўйлар ярашади. Юртимизнинг мустақиллигига кўз тегмасин.
Барчамизга яқинлашиб келаётган энг улуғ ва энг азиз байрам – Мустақиллигимизнинг 29 йиллиги муборак бўлсин!
Ж.Усманова,
Ҳазорасп туман ҳокимлиги Ахборот хизмати раҳбари.