ЭҲТИЁЖМАНД ОИЛАЛАРГА БЕПУЛ БУҒДОЙ ТАРҚАТИЛДИ

Автор: Сабрижамил Июнь 20, 2022

Ҳазорасп тумани миришкорлари жорий йилда 3 минг гектар майдонда маҳаллий иқлимга мос, тезпишар ғалла навларини парваришлаб, мўл ҳосил тўпладилар. Ўрим-йиғим уюшқоқлик билан ўтказилиб қабул пунктларига ризқ-рўзимиз бўлган дон топшириш жараёнлари давом этмоқда.

Айни дамда кўпчилик фермерларимиз шартномавий режаларини ортиғи билан бажариб, илғорлар сафидан ўрин олмоқдалар.

Шунингдек, илғор ғаллакорлар кам таъминланган оилаларга моддий кўмак бериш учун уларнинг ҳар бирига бепул дон бериш таклифини илгари сурдилар. Бу ташаббус туман ҳокими Ўктам Машарипов томонидан қўллаб-қувватланди ва бугун тумандаги “Мустақиллик” маҳалласи ҳудудида жойлашган “Соли Туркман” фермер хўжалигида туман прокурори Дилшод Мадиримов ва илғор фермерлар иштирокида кам таъминланган оилаларнинг ҳар бирига 300 килограммдан бепул буғдой ва сомон боғламалари тарқатилди. Яъни дастлабки кунда 65 тонна буғдой 216 та кам таъминланган оилага берилди.

-Мен “Аёллар дафтари”да тураман. Бугун бизга 300 килограмм буғдой бепул беришди. Албатта. Омборимиз донга тўлаётганидан қувончимиз чексиз. Илоҳим, юртимиз тинч, мамлакатимиз обод бўлаверсин. Деҳқонларимизнинг етиштираётган озиқ-овқат маҳсулотлари янада мўл бўлсин. Кўрсатилаётган бундай ғамхўрликлар учун давлатимиздан беҳад миннатдормиз,-дейди Умида Абдуллаева.

– Мен “Темир дафтари”га киритилганман. Бугун уйимизга бепул буғдой келтирдилар. Жуда хурсандмиз оиламиз билан. Инсон учун саломатлик ва нондан азиз нарсанинг ўзи йўқ. Кўрсатилган бу ёрдам дастурхонимизни анча вақт обод қилади. Бунинг учун ушбу ишлар бошида турган инсонларга ўз миннатдорчилигимни билдираман, – дейди Адолат Бекчанова.