Ҳазорасп туман ҳокими Ўктам Машариповнинг туман аҳолисига МУРОЖААТИ
Ҳурматли элдошлар!
Барчамизга маълумки, кейинги пайтларда мамлакатимизда коронавирус билан касалланганлар сони кундан кунга ошмоқда. Сабабики, бу бизнинг ҳотиржамликка берилганлигимиз, санитария ва эпидемиология талабларига етарли даражасида риоя этмаганимиз, карантин талабларига зид бўлган ҳаракатлар қилганлигимиз оқибатидир.
Давлатимиз раҳбари ҳам “Тиббиёт қанчалик ривожланган бўлмасин, давлат бунга қанча-қанча маблағ ажратмасин, одамларимиз шифокорлар тавсиясига амал қилмаса, тартиб-интизомли бўлиб, карантин қоидаларига риоя этмаса, барча кўрилаётган чораларимиз, пандемияга қарши курашиш учун сафарбар қилинган юз минглаб фидойи инсонларнинг меҳнати беҳуда кетиши мумкин”, дея ўз мурожаатларида таъкидладилар.
Чунки, қачонки ҳар биримиз менга вирус таъсир қилмайди, мендан узоқда деб эмас касалликни юқтириб олмаслигимиз, бу офатдан тезроқ қутилишимиз учун санитария-гигиена талабларига тўлиқ амал қилсак, бепарволикка йўл қўймасак, зарурат бўлмаганда кўчага чиқмасак, жамоа бўлиб йиғилмасак, карантин қоидаларига қатъий амал қилсаккина бу вирусни енгишимиз мумкин бўлади.
Шу боис, Ҳукуматимиз томонидан 2020 йилнинг 10 июлдан 1 августга қадар қатъий карантин эълон қилинди. Хусусан 10 июлдан уй шароитида даволанаётган беморлар ҳамда карантинга олинган шахсларга тиббий маслаҳат ҳамда ахборот беришга қаратилган туну кун узлуксиз фаолият кўрсатувчи 1105 қисқа рақамли Call-маркази фаолияти йўлга қўйилмоқда.
Азиз элдошлар!
Ўзингизда бирор нохушлик, ҳолсизлик, иситма каби касаллик аломатларини сезсангиз бефарқ бўлманг, дарҳол шифокорларга мурожаат қилинг ва назоратда бўлинг, ўзингизни яккаланг ва ўз вақтида зарур муолажаларни кўринг.
Биз COVID-19 касаллигини биргаликда, жипсликда, ҳамда бу борада белгиланган барча қоидаларга риоя қилиш орқалигина енгиб ўтишимиз мумкин.
Ҳурматли фуқаролар ўзингиз ва яқинларингиз саломатлигини асранг!